05/12/15

Azerbaijan, fogu in una prataforma petrolìfera

de Lisandru Beccu

Deretos Rainews24, Url imàgine

Eris, in intro de note, unu fogu ispantosu at pesadu in fumu una prataforma petrolìfera azera, in su sud de su Mare Càspiu. Una temporada at cajonadu s'esplosione de una conduta de gas.
Sa nova est essida a campu petzi oe. Su cabu de su comitadu indipendente azeru pro s'amparu de sos deretos de sos traballadores petrolìferos at naradu chi 32 pessones nche sunt ispèrdidas e 42 bi sunt resèssidos a las sarvare.
Sa sotziedade petrolìfera istatale, sa Socar, imbetzes at comunicadu petzi su nùmeru de sas pessones sucùrridas sena nàrrere si b'àeret vìtimas. Gasi etotu ant fatu sas autoridades, sena fàghere a cumprèndere de su chi est acontèssidu in su giatzimentu de Guneshli. Petzi a pustis, su presidente de sa repùblica Ilham Aliyev at faeddadu de unu mortu e de 32 ispèrdidos.
Sas operatziones pro nche bochire su fogu sunt ancora in motu, ma sunt ostacoladas dae su bentu e dae sas undas, artas ùndighi metros.
Ocannu coladu in sas prataformas de sa Socar b'at mortu 14 operajos.