06/12/15

Casteddu - Como 1-1

de Lisandru Beccu


Su Casteddu in su Sant'Elia aiat bìnchidu semper, ma oe b'at pensadu una connoschèntzia reghente de sos ruju-biaitos a lis firmare sa sèrie positiva. Gianluca Festa. Issu chi, finas a s'annu coladu fiat sa ghia in panchina de s'iscuadra sarda.

Su Como, ùrtimu in classìfica, cumintzat sa partida amparende·si dae totu sos corfos infèrchidos dae sos òmines de Rastelli. Su primu tempus difatis est totu de marca casteddaja, ma s'iscuadra no agatat tretos pro li pònnere pensamentos a Scuffet. A su de 10 minutos bi proat Melchiorri, però su portieri est atentu e respinghet. Su primu tempus si nche serrat sena ànimu, non b'acontèsset belle nudda.

Sa partida torrat a cumintzare cun sos lombardos chi nche colant in vantàgiu. A su de 49 minutos, dae su ladus de manca, Bentivegna nche ponet in mesu de s'àrea minore unu passàgiu traessu, Ganz nche collit sa botza e tirat a a corfu seguru, giughende·nche sos suos in vantàgiu. 

Su Casteddu no est de acordu e chircat deretu de paregiare, Sau nche marcat s'1-1, ma a pàrrere de s'assistente de lìnia sa botza non nch'est intrada de su totu. Sa partida si nch'alluet e sos sardos chircant in cada manera de nche la paregiare, ma sa sorte paret chi oe lis apat furriadu sas palas. 

A su de 72 minutos s'àrbitru l'ammustrat sa segunda targhita groga a Fossati. Giogu perigulosu. Su Casteddu abarrat cun 10 òmines. Su Como est a proa de nche marcare su de duos, ma est su palu custa borta a respìnghere su tiru de Ganz. 

Cando paret totu cumpromìtidu sos sardos parègiant. Est su de 92 minutos e, dae unu fiotu de giogadores in s'àrea comasca, nch'essit Farias chi lis dat a sos pees de Joao Pedro sa botza de s'1-1. Non b'at prus tempus pro nudda.
 
Su Casteddu conchistat unu puntu e nch'andat a vuota 33. Como però no est prus a primu, a 34 b'est su Crotone.

Formatziones

Casteddu: Storari, Murru, Ceppitelli, Krajnc, Pisacane (69' Balzano), Di Gennaro, Barella (58' Farias), Fossati, Melchiorri (62'Cerri) Sau, Joao Pedro.
Allenadore: Màssimo Rastelli

Como: Scuffet, Marconi, Cassetti, Giosa (75' Borghese), Ambrosini, Jakimovski (58' Casoli), Bessa, Benedicic (81' Brillante), Bentivegna, Ganz, Ebagua.
Allenadore: Gianluca Festa

Gol: 49' Ganz, 92' Joao Pedro

Espulsos: 72' Fossati