05/12/15

Istados unidos. The New York Times, editoriale contra a sas armas

de Maurìtziu Sale

Deretos Ansa URL imàgine


Est sa prima borta, a pustis de belle unu sèculu, chi The New York Times, in die de sàbadu, pùblicat un'editoriale in prima pàgina. Su Nyt - s'ischit - est unu cuotidianu cun una tiradura fitiana de 1.125mìgia còpias. Nùmeru chi nche crompet a belle 1.700mìgia in die de sàbadu e de domìniga. In prus est su giornale chi at bìnchidu prus Pulitzer  - chentu e unu -  dae cando ant istituidu su prèmiu, in su 1917. Non pròpiu una punta de billete duncas.  E si su comitadu de redatzione at seberadu sa die de sàbadu, unas cantas resones bi diant dèvere èssere istadas. In tantu bidimus deretu chi su tema pertocadu est prus chi non dìligu: una rechesta solenne a su guvernu e duncas a su presidente Obama, pro chi mènguet e regulamentet sas armas e s'impreu issoro in sos Istados unidos. A pustis de sos disacatos internos, de sas isparatòrias massivas, de sos mortos cajonados dae una mentalidade chi nch'at barigadu cale si siat sentidu. Cale si siat règula. Cale si siat cussèntzia o resone.

Non sunt - custas - noas de leare a sa lèbia. O de nche pònnere a un'ala petzi pro more chi movent dae unu intre sos paisos prus armados e prus orientados conca a sa gherra. Ponende·nche a un'ala sos pregiudìtzios podimus nàrrere chi est una intre sas noas prus fundudas, de giudu e de importu de totu su 2015. S'editore, Arthur Sulzberger Jr., afirmat chi su sèberu de publicare in prima pàgina est istadu leadu «pro difùndere unu pensu forte de amargura, de iscunfortu e de malesaura pro sa discapassidade de sos Istados unidos a parare fronte a un'impreu sena cabu de sas armas. E pro chi siat visìbile a totus a ue nch'est cròmpida s'epidemia. Pròpiu custu - epidemia - fintzas si est grae, est su faeddu chi nos dat sa mesura giusta de su sentidu chi tenet s'editoriale nostru. E contos giustos nos dat de su disacatu chi semus colende·nche sena perunu amparu aparente».


Ammentamus in finitias, petzi pro dovere de crònaca e pro chi cadaunu si potzat fraigare un'idea personale, chi su Nyt tenet finas un'editzione in lìnia, giai dae su 1995; chi oe in die est unu intre sos sitos giornalìsticos prus cumpudados in totu su mundu; chi pertenet a s'àrea liberale e progressista; chi est atentu meda a sas chistiones sotziales ma chi - in su matessi tempus - est defensore acanidu de su capitalismu; chi nche costoit in su sinu su rispetu pro sos deretos individuales, pro sa libertade, ma fintzas pro su mercadu lìberu e pro sa cuncurrèntzia. E chi, a maju de ocannu, sos utentes nch'ant barigadu sos 35 milliones. Non pròpiu una ventanedda cara a sa corte, duncas.