05/12/15

Istadu de emergèntzia in Frantza. Pro su Colletivu contra a s'islamofobia est una vindita ingiurgiosa e umiliante

de Màuru Piredda

Deretos democracynow.org

«Ingiurgiados, umiliados e lassados a banda dae su guvernu». Sunt is faeddos de Yasser Louati, militante de su Colletivu frantzesu contra a s'islamofobia, intervistadu dae su giornale americanu Democracy now in contu de is mesuras "anti terrorismu" aprontadas a pustis de su degòlliu pariginu. «Si custa no est una vindita contra a is musulmanos - at agiuntu Louati - a nos ischides nàrrere ite est?»

Bernard Cazeneuve, ministru de s'internu de s'istadu (de emergèntzia) frantzesu, at annuntziadu chi, finas a imoe, ddoe at àpidu unas duamìgia compidadas, 263 arrestos, 300 libertades vigiladas e 3 moscheas tancadas. «Pro ite?», pregontat Louati: «Si is moscheas sunt prus chi non bardiadas, pro ite ddas còmpidant a dae chi ischint chi non ddoe ant a agatare nudda? A ite a sa violèntzia ddoe agiunghent s'umiliatzione?»

Deretos democracynow.org

In prus de is assartos a is logos de cultu Louati at faeddadu finamentas de libros imbolados, de infrusadas in is ristorantes e de brutalidades chi, in Nitza, ant interessadu una pipia de 6 annos: «Ant isparadu duas bias a sa ghenna pro nch'intrare a una domo. Una cantas àstulas nche sunt cròmpidas a su tzugru de sa pitzinna. A pustis sa politzia at naradu "Passèntzia, non fiat sa domo giusta" e si nche sunt mòvidos»

Louati, a coa de s'intervista at faeddadu de sa crisi de is refugiados faghende unu parallelismu cun is ebreos chi in su segundu perìodu bèllicu chircaiant amparu peri s'Europa: «Ma ammentade·bos chi sa Grandu moschea de Parigi ddos allogaiat cando chi sa Frantza nche ddos imbiaiat a Germània in ue nche ddos isperdiant. Oe tocat a is sirianos, ma nemos imparat s'istòria a is pipios»