03/12/15

Mala tempora currunt. Hitler torrat a campu in Germània

de Maurìtziu Sale

Deretos Ansa. Url imàgine

Ocannu, a mesunote intre su 31 de su mese de Nadale e prima die de Ghennàrgiu, iscadint sos deretos de autore de unu libru famadu e iscurigosu. Sa ghia morale, sotziale, polìtica e bèllica prus connota e lèghida. Peri totu su mundu. Segunda forsis, pro fama e difusione, petzi a su libru de sos libros: sa Bìblia.

 A su chi narat rivistastudio, «sa prima editzione est essida in su mese de trìulas de su 1925, in sa tipografia Frantx Eher Verlag de Mònacu cun custu tìtulu: Eine Abrechnung (Unu rendicontu, nda). Sa segunda in su mese de Nadale de su 1926. Posca, cando s'autore si nch'est mortu, sas editziones fiant una dosina, bortadas in 16 limbas e bèndidu ant prus de 12milliones de còpias, in una natzione ebbia: sa Germània. Petzi a pustis de sa morte aiant postu, cun lege, su vetu siat a s'imprenta, siat sa difusione suas».

Semus chistionende de su Mein Kampf de Adolf Hitler. Su bisu malàidu de un'òmine in cherta de assimigiare a Deus. Sa mira de nche li furare, in s'imaginàriu suo, sas trassas de onnipotèntzia e de ubicuidade a su chi Anselmu aiat definidu comente Id quod maius cogitari nequit (Su chi cosa prus manna non si nde podet pensare, nda). Cun totu su chi li pigaiat in contu de umanidade, de disinnos terrenos e fintzas ultra-terrenos. Una bùssula, una mapa de annestru pro mìgias e mìgias de sighidores de su ditadore prus orrorosu chi apat mai bidu lughe de sole. E chi, galu oe e a dolu mannu, sìngiat su nord isfaddidu de unos cantos guvernantes de su tempus nostru.

S'Istitutu de istòria cuntemporànea de Mònacu at dadu a intèndere chi, dae su mese ch'intrat, nch'at a ammaniare sa ristampa de 4mìgia còpias. At a costare 59 èuros e at a tènnere prus de 3500 notas esplicativas a costàgiu. Glossas crìticas, ammaniadas - paret - dae un'iscuadra de istòricos intre sos prus famados de Europa, forsis de su mundu. Est sa prima borta, a pustis de sa segunda gherra manna, chi su libru connoschet una ristampa ufitziale. A prima die de s'annu chi benit, sunt 70 annos chi nch'est mortu su Führer e duncas nche derruent totu sos deretos de autore. Deretos chi sos alleados aiant afidadu a su Land de sa Baviera, a pustis de sa derrota de su regime nazista.

In unu primu momentu, in su 2009, su parlamentu locale bavaresu aiat aprovadu una lege pro sustènnere un'editzione crìtica de su testu. In su 2012 su guvernu regionale aiat mudadu idea, cun un'àtera lege. Crompende·nche in finitias a minetzare in pùblicu - su 12 de Nadale de su 2014 - chi diat àere persighidu, cun s’acusa de impuntza a s'òdiu ratziale, a chie si siat l'aeret publicadu. E como galu un'àteru disinnu. A s'imbesse. A deretos iscadidos. Si nch'est acabbada gosi duncas, una chistione giurìdica chi est durada annos.

Est curiosu a beru s’òmine. E curiosos sunt, a bias, sos disinnos suos. A seberare, mescamente in tempos che a sos chi semus colende·nche, una publicatzione gosi dìliga, chi li podet fraigare un’audìtziu galu prus mannu a un’àteru òmine. Òmine chi costumaiat imbetzes a los brusiare, sos libros. Mala tempora currunt.