03/12/15

Sassuolo-Casteddu 0-1

de Lisandru Beccu



Su Casteddu nche crompet a Sassuolu, cun s'ispera de nche riscatare sos bator gol chi nch'at collidu sàbadu coladu dae su Brescia, ma custa est sa Copa Itàlia e sa mùsica est un'àtera. Sos sardos sunt cumbintos de fàghere una partida bona, ma sos òmines de Di Francesco in sa carta sunt favoridos. Chie binchet, su 15 de Nadale andat a giogare a Milanu contra a s'Internatzionale.

Sos primos deghe minutos de giogu nche colant sena peruna emotzione, su botza curret a bellu intre sos pees de sos giogadores. Cerri, in chirca de glòria, tirat dae pagu tretu, ma sa presse est inimiga de sa pretzisione. Su tiru est tzentrale e Pègolo parat. A su de 19 minutos Floro Flores proat a animare sa partida cun unu tiru dae 30 metros, ma sa mira est isballiada. Bi torrat a proare in contratacu a su de 21 minutos, ma su tiru nch'essit, barighende·nche sa traessa. Sas iscuadras chircant de iscutinare sa partida, su giogu no est pro nudda allegru, mancat semper s'ùrtimu iscatu pro nche cròmpere a su gol. A su de 33 minutos Farias si nche lìberat de duos defensores e intrat a intro de s'àrea. Su giogadore però perdet s'echilìbriu e su tiru si nch'essit a foras. A su de 36 minutos est determinante unu contratacu de sos sardos. Cerri agatat su tretu giustu pro nche pònnere sa botza in sos pees de Sau chi, si nch'agatat in dae in antis de su portieri, nche lu setzet e nche marcat su vantàgiu. Semper Cerri arriscat de nche sinnare su de duos, ma non bi resesset a concruire.

Su segundu tempus paret chi apat unu ritmu prus ispibillu. Su Casteddu si mantenet artu e pressat meda sos aversàrios. A su de 51 minutos Cerri est torra su protagonista cando nche collit una botza a bolu, ma dae pagu tretu nche l'iscudet a sa tribuna. Su Sassuolo nche cròmpet semper a su lìmite de s'àrea, ma non resesset a concruire. Sa defensa de sos ruju-biaitos est bene posta. A su de 85 minutos Defrel, intradu in cambiu de Floro Flores, nch'intrat a intro de s'àrea dae su ladus de dereta, ma su tiru est artu. Su Casteddu cumintzat a acusare s'istrachidùdine, como sunt sos emilianos a gestire mègius sa partida. Ma non b'at prus tempus, sos òmines de Rastelli nche colant a sos otavos de finale.

Sassuolo: Pègolo, Longhi (53' Peluso), Acerbi, Ariàudo, Gazzola, Duncan (57' Politano), Pellegrini, Biondini, Floro Flores (67' Defrel), Falcinelli, Berardi.
Allenadore: Eusèbio Di Francesco

Casteddu: Cragno, Barreca, Benedetti, Salamon, Balzano, Deiola, Colombatto, Tello, Sau (56' Giannetti), Farias (90' Bernardi), Cerri.
Allenadore: Màssimo Rastelli

Gol: 36' Sau