04/12/15

Sìria. Bombardamentos britànnicos in intro de note, a pustis de su nulla obsta parlamentare. Daesh minetzat deretu sa revesa

de Maurìtziu Sale

Deretos Ansa/Epa. URL imàgine

Sa promissa l'aiat fata in Parigi, sas dies coladas. Aiat antitzipadu a s’imprenta internatzionale chi diat àere riunidu su parlamentu pro dibàtere e votare si e cando nch'imbiare sos aèreos a subra de sa Sìria, contra a Daesh. Cameron - paret duncas - est un'òmine de paràula. Nessi pro su chi pertocat sa paràula bombardamentu, a dae chi in su discursu suo, eris, l'at mentovada 17 bias. In pagu prus de binti minutos.

Dae Downing Street nche crompet sa cunfirma a su chi giai aiat annuntziadu Sky News. Duos Tornado de sa Raf, mòvidos in pessu colada sa mesunote, dae sa base de Akrotiri in Tzipru, ant corfadu - pro sa prima bia - obietivos Daesh in Sìria. S'atacu est istadu autorizadu a unas cantas oras dae su disinnu parlamentare. Nulla obsta leadu cun grandu majoria, finas cun s'agiudu de su grupu internu a su partidu laburista. Autorizatzione chi imbetzes, sos matessi rapresentantes, aiant negadu in s'istade de su 2013, cando s'obietivu fiant sas trupas de Bashar Assad. Daesh - nos narat Site, giornale in lìnia chi est semper subra su fatu controllende s'atividade jihadista in sa Rete - at giai promissu revesa contra a su Rennu unidu. E, si mantenet sa paràula comente at fatu Cameron, nos amus a dèvere isetare cale si siat acontèssida.

Sa Raf, pro no abarraret a sa fidada, at ischieradu, semper in Tzipru, in sa base mentovada de Akrotiri, àteros 8 bombarderis Tornado. Sos matessi aèreos chi - a oe est prus de un'annu - est impreende contra a Daesh in Iraq e chi duncas, a dae chi sunt afidàbiles mancari siant betzos, si diant pòdere sighire a impreare fintzas in Sìria. In prus Cameron at chistionadu de afortire sa flota aèrea de Akrotiri cun àteros 2 Tornados e àteros 6 Eurofighter.

Est gherra aberta duncas. E sa gherra mancari siat tecnològica - giai s'ischit - corfat prus sos bersàllios a costàgiu chi non sos obietivos dislindados. E a nde prànghere ant a èssere semper prus sos tziviles. E sas dudas, sas de sos meses in pessu colados, paret chi si nche siant isvanèssidas. Unas cantas dies a oe, pròpiu in Parigi, in ocasione de sa cunferèntzia Onu pro su clima. Addòbiu in ue sos potentes ant chistionadu de totu, francu chi non de clima atmosfèricu. Sos argumentos, a dolu mannu, pertocaiant sa gherra e non pro nche l'istransire o pro illebiare su clima de tensione. Ma pro impuntzare su disacatu climàticu de orìgine bèllica chi est carrargende·nche su mundu intreu.