05/03/16

Incantos e disauras de Sardigna in unu documentàriu

de Lisandru Beccu



Est mòvidu eris dae Golòtene, organizadu dae ilMarghine.net, in un'àula consiliare prena (b'aiat pagu prus o mancu unas 120 pessones), su rodeu de su documentàriu Sardegna: il tramonto di un paradiso. Su traballu l'aiant giai presentadu su 27 de su mese coladu in sa sala Filipu Canu de Portu Turre, tzitade sìmbulu de su traballu, ma fintzas de incuinamentu.


S'idea est nàschida dae sa sensibilidade de sete giòvanos (membros de su Lion's Lab) chi, càrrigos de passione e de amore pro custa terra, diant chèrrere fàghere connòschere sas realidades, bonas e malas, de s'ìsula. «Custu progetu est indiritzadu a sos giòvanos – at naradu Càralu Gaspa, responsàbile de sa comunicatzione, – cherimus chi s'acòstient a tzertos argumentos e chi connoscant custas realidades».

B'at chertu duos annos de traballu cun sete meses de ripresas pro nche cròmpere a su resurtu de oe. Su documentàriu, agiudadu petzi dae su finantziamentu colletivu e dae sas donatziones ispontàneas, ammustrat sas problemàticas ambientales e sos dannos, cajonados dae un'industrializatzione sena controllu. Suta de sa lente nche sunt fertas sas àreas incuinadas de Portescusi, de Sarrocu, de Tòssilo, de Frùmene santu e de Portu Turre. Non mancant sas anàlisis e sas crìticas a una manera pagu dèghida de propònnere su traballu, baratende·lu, a s'ispissu, cun sa salude.

Ma non b'at petzi disauras in sas imàgines. Intre sos otanta minutos de filmado b'at fintzas ocasiones pro valutare sas alternativas sustenìbiles e pro apretziare galanias naturales che a su Supramonte, su Limbara, su Montarbu e su Concale de su terràinu.

Sas projetziones ant a sighire peri totu sa Sardigna in sos meses de martzu, de abrile. A maju, sa projetzione at a tocare fintzas unas cantas tzitades europeas.