05/03/16

Trapani-Casteddu 2-2

de Lisandru Beccu



Oe sa pretesa fiat sa de bìnchere e cumbìnchere pro nche serrare tres giorronadas pagu profetosas. Sos òmines de Rastelli nch'ant collidu petzi tres puntos in sas ùrtimas tres partidas. Su de oe, cun su Trapani, est su de tres disafios de s'istajone. Unu in Copa Itàlia e sos àteros duos in campionadu.

Serse Cosmi, imbetzes, cheret bìnchere pro abarrare in cuntatu cun su trenu de sos isparègios e sos propòsitos, a pustis de oto minutos, sunt giai bonos. Coronado, dae su ladus de manca, òperat unu tiru lìberu a mesu de s'àrea. Sa botza nch'iscudet a sas cambeddas de sos defensores e torrat in segus a sos tretos de Pagliarulo chi, a sa sola, iscravigat a porta e nche marcat s'1-0. Ma no est acabbada inoghe. A pustis de tres minutos su Trapani movet in contratacu cun Citro chi, nche brincat fintzas a Storari, e nche ponet sa botza in intro. 2-0 a pustis de ùndighi minutos. Su Casteddu chircat de si nch'ischidare, ma devet fàghere sos contos fintzas cun su bentu contràriu. In sos ùrtimos minutos de su primu tempus sos sitzilianos movent torra in contratacu, ma custa borta Storari intertzetat su tiru de Perticone e sarvat su resurtadu. Sa defensa ruju-biaita oe no est bastante cuntzentrada.

In su segundu tempus sos casteddajos sonant un'àtera mùsica. Farias nche collit unu bellu passàgiu de Melchiorri, intradu dae pagos minutos, e nche marcat s'1-2. Sos ruju-biaitos ant una paja de ocasiones pro nche paregiare sa partida, ma sos granados s'ammuntant bene. A bellu a bellu su ritmu mènguat e cun issu fintzas sas possibilidades de bìdere carchi àteru gol. Ma in su segundu minutu de recùperu arribat su parègiu firmadu dae Joao Pedro. Su brasilianu sinnat su 2-2 cun unu destru a filu de su palu. Pagos minutos e s'àrbitru nche frùschiat s'acabbu. Abarrat sa delusione pro nch'àere imboladu a s'arga totu su primu tempus.

Su parègiu non bastat pro mantènnere su primu postu in classìfica. Su Crotone, binchidore contra a s'Ascoli, nch'at barigadu su Casteddu e como cumandat sa Sèrie B cun unu puntu de vantàgiu.


Formatziones

Trapani: Nicolas, Scognamiglio, Pagliarulo, Perticone, Rizzato, Nizzetto, Eramo, Fazio, Coronado (64' Raffaello), Petkovic, Citro (90' Montalto).
Allenadore: Massimo Rastelli

Casteddu: Storari, Krajnc, Salamon, Pisacane (46' Melchiorri), Murru, Colombatto (52' Deiola), Cinelli, Balzano, Joao Pedro, Farias, Sau (67' Cerri).
Allenadore: Serse Cosmi

Gol: 8' Pagliarulo, 11' Citro, 48' Farias, 92' Joao Pedro