06/01/17

Artìculu 18: pro s’Abogadu de s’Istadu su referendum est manipulatzione ebbia

de Maurìtziu Sale



Su Referendum chi at promòvidu sa Cgil - cun prus de 3 milliones de firmas giai achiridas - pro nch’abrogare sas modìficas a s’artìculu 18 de s’Istatutu de sos traballadores,  segundu s’Abogadura de istadu  no est ammissìbile.  Est su chi si leghet in sas tres memòrias, una cada cuesitu, presentadas eris in nùmene e pro contu de sa Presidèntzia de su Consìgiu, cara a sa Consulta. Non diat èssere vàlidu ca mirat petzi a manipulare sa normativa vigente. Diat èssere un’atu inùtile e petzi contra a su Decretu de su traballu aprovadu dae su Guvernu Renzi (Jobs Act) e arriscat de codiare bòidos normativos graes. S’at a pronuntziare duncas sa Corte costitutzionale.  Sunt tres sos cuesitos referendàrios sutapostos a su controllu de sa Grandu Corte. Unu cuesitu pertocat sos litzentziamentos, unu sas dispositziones chi lìmitant sa responsabilidade solidale de apaltante e apaltadore a dannu de su traballadore e unu pertocat sos bonos de pagamentu (voucher) pro su traballu sussidiàriu o ocasionale. Sos Giùighes costitutzionales incarrigados pro sa verìfica sunt: in contu de litzentziamentu Silvana Sciarra, in contu de apaltos Mario Morelli e in contu de bonos Giulio Prosperetti.  Isetamus sa Corte  duncas, chi s’at a pronuntziare s’11 de ghennàrgiu .