04/01/17

Grillo: «Giuria populare pro averguare sas noas». E comente?

de Màuru Piredda


Deretos lìberos. Url imàgine


«Giornales e Tg sunt sos primos fraigadores de noas farsas in su paisu cun s'obietivu de mantènnere a caddu sos chi detenent su poderiu». Sunt sos faeddos de Beppe Grillo, majorale de su Movimentu 5 isteddos, a pustis de sas «fàulas in internet» mentovadas dae unas cantas figuras de su panorama polìticu-istitutzionale italianu (Mattarella, Gentiloni etc.) e dae su presidente de s'Antitrust, Giovanni Pitruzzella.

Pro su còmicu furriadu a polìticu, non bi diat chèrrere «unu tribunale guvernativu», ma «una giuria populare chi apostivighet sa veriditzidade de sas noas publicadas dae sos mèdios». Chie b'at a dèvere intrare in custa giuria? «Tzitadinos sorteados». Pro ite? «Pro valutare artìculos e servìtzios. Si una noa resurtat farsa, su diretore, a conca bassa, si devet iscusare in pùblicu e devet pònnere sa versione curreta cun grandu evidèntzia a comintzu de su tg o in prima pàgina»

A banda sa risposta de Mentana (nât chi lu cuerelat a Grillo) e a banda s'artìculu 8 de sa lege 47 (chi decretat su deretu de rèplica), su chi ispantat est sa forma proposta dae Grillo. Chie los sorteat sos tzitadinos? E cale ant a èssere sos critèrios pro chi unu tzitadinu potztat èssere sorteadu? Cales connoschèntzias professionales, tècnicas e sientìficas diat dèvere àere? E comente las diat dèvere achirire? Cun una formatzione obligatòria a fitianu (e pro su prus deontològica) che a sa chi devent sighire sos giornalistas?

Non b'at bisòngiu de tribunales anti-bùfalas in internet. Ant a èssere issas etotu, sas bùfalas, a ispaniare sos anticorpos pro chi sos letores las iscant reconnòschere e giagarare. Sena lu chèrrere podent dare a sos utentes sas craes pro segudare sa veridade ispronende·los a s'iscumprou de sas fontes.

Ma a Grillo, chi, atachende giornales e tg costumat a ammentare sa de 77 positziones de s'Itàlia in sa classìfica mundiale de sa libertade de informatzione, tocat a li nàrrere chi àteros sunt sos paràmetros pro iscumproare custa libertade fartada: minetzas a sos giornalistas e cuntzentratziones editoriales a primu de cale si siat àtera cosa. E chi una proposta che a sa sua, pro seguru, no agiuat a los resòlvere custos problemas.